घमंड चूर-चूर वैईग्यों
एक लगाई सूबे-सूबे,
गोदड़ी ने जोर ऊँ पटकी,
अबाणु जमाई न मेली,
पाछी परी लटकी।
======00=====
गोदड़ी बोली धीरे मेल,
घमंड कणी पे करे हैं,
थूँ जिने अतरो चावें,
वो जादा म्हारा पे मरे हैं।
======00=====
थूँ कतरोई सणंगार करी ले,
वंडों भोजन ऊँ पेट भरी ले,
ठंड लागताई न म्हारे पा आवें,
थूँ कतराई मंतर फेरी ले।
======00=====
कतरा परेम ऊँ म्हनें वो,
आकी रात लपाई राखें,
सूबे तक नी छोड़े म्हनें,
थूँईस सूबे पाणी फाँके।
======00=====
म्हारों रंग रूप हाऊँ नी हैं,
भली क ई काम नी कीदो,
म्हारा मा अतरा गुण तो हैं,
वंडे हिवड़ा ने जीती लीदो।
======00=====
पूछी लिजे थारा धणी ने,
अबाणु किने जादा चावें,
एक दन भी म्हूँ नी मली,
तो वो वेन्डों वैई जावें।
======00=====
थारा मा न म्हारा मा वेन्डी,
ओईस तो हैं अंतर,
म्हारा मा हवारथ नी हैं,
थूँ हवारथ रो भर्यों कनस्तर।
======00=====
राजन आ हुणताई न लगाई रा,
हाथ-पग ठंडा वैईग्यां,
घमंड चूर-चूर वैईग्यों,
मुंडा रा बोल मुंडा मी रैईग्यां।
मुंडा रा बोल मुंडा मी रैईग्यां।।
======00=====
वाइस प्रिंसिपल-रा उ मा वि नमाना
नि-कोठारिया, जि-राजसमंद, राजस्थान