लंपट अठै चाली निकळे : राजेन्द्र सनाढ्य राजन

विज्ञापन

आँखां ने मसळी वे तो, 

धोबों खांड धोखों निकळे,

छाती ने चीरी वे तो, 

मीनु कोरों खोकों निकळे। 

======00=======

खोपड़ी ने फोड़ी वे तो, 

किलो खांड गोबर निकळे, 

काया ने निचौड़ी वे तो, 

टोपलों खांड डोपर निकळे। 

======00=======

मन ने खोद्यों वे तो, 

टरोली खांड भाटा निकळे, 

दिल ने काट्यों वे तो, 

मतारी खांड काँटा निकळे। 

======00=======

हथेळ्यां ने घसी वे तो, 

करोड़ों री लूट निकळे, 

थोबड़ी ने जगदी वे तो, 

टरक खांड झूठ निकळे। 

======00=======

नाक ने जबल्यों वे तो, 

बोर्या बंधु करोध निकळे, 

पगतळ्यां ने छोली वे तो, 

सैंकड़ों जीवां री मौत निकळे। 

======00=======

चामड़ा ने चीर्यों वे तो, 

पीपों खांड कीटों निकळे, 

धोळा गाबा फाड़्यां वे तो, 

मीनु आदमी ढीटों निकळे। 

======00=======

अपने-आप ने फरीस्ता हमझे,

मोटी मूँछा ताणी निकळे, 

राजन जस्या रोता रैई जा, 

लंपट अठै चाली निकळे। 

लंपट अठै चाली निकळे।। 

राजेन्द्र सनाढ्य राजन

वाइस प्रिंसिपल : रा उ मा वि नमाना

नि-कोठारिया, जि-राजसमंद, राजस्थान.

रचणां नं- 4449

विज्ञापन

और पढ़ें...

ये भी पढ़ें...

WhatsApp पर शेयर Facebook